Në kuadrin e Ditës Botërore të Turizmit, sot më dt 27 shtator 2009, Agjencia Kombëtare e Turizmit zhvilloi aktivitetin e saj, nën moton "Duke festuar Diversitetin".
Qëllimi i këtij aktiviteti është rritja e ndërgjegjësimit për vlerat kulturore, sociale dhe ekonomike të turizmit.
Fjala e rastit u mbajt nga ministri i Turizmit, Kulturës, Rinisë dhe Sporteve, z. Ferdinand Xhaferri.
Këtë ditë sheshi Skënderbe u përfshi në një atmosferë festive.
Çifte valltarësh të Ansamblit Shtetëror të Këngëve dhe Valleve interpretuan valle të ndryshme nga treva të Shqipërisë. Ky aktivitet u shoqërua dhe me imazhe shumë të bukura me punime të fëmijëve nga Qendra Kulturore e Fëmijëve, si dhe një ekspozitë me punime artizanale shqiptare.
Në krye të sheshit Skenderbe bie në sy Banera e madhe me logon e OBT-së e shoqëruar me slogane, çadra, postera me logon e turizmit shqiptar.
Në këtë veprimtari ishin të ftuar përfaqësues të institucioneve shtetërore, si dhe përfaqësitë Diplomatike në Shqipëri, të cilët u pritën me një kokteil të përgatitur me gatime karakteristike të shoqëruara me pije tradicionale shqiptare.
